باران

*باران*

دڵم لە خەیاڵی خۆیدا

بە قەباری خۆشەویستی خۆی

ئاسمانی گەشی فڕینی تۆیە!

تۆ تیڤۆکە بچووکێکی

چەتوون و جوان

لەم چڵ بۆ ئەو چڵ ،

لەم پەڕ بۆ ئەو پەڕی کۆڵانەکان ،

نە ماڵێک و نە دووان ،

نە شەقامێک و نە سەربانێک ،

نە بەر دەلاقە و پاساری

هیچ ماڵێکی ناو سینگم ماوە

کە بۆ چرکەیەکیش

ئۆقرەت نەگرتوو بێت تێ دا ؛

وەها تێکەڵی

بە کۆڵان بە کۆڵان و

بست بە بست و

هەنگاو بە هەنگاو لەشم ،

کە دەڵەی هیچ

تیڤۆکێکی تر

جگەلە تۆ

وەها وردیلە و بەناز ،

وەها ناسک و خانم

لەم دوونیایە نیە!

و

دڵم لە خەیاڵی خۆیدا

بە قەباری خۆشەویستی خۆی

ئاسمانی گەشی فڕینی تۆیە!

بەڵام باران ،

لە خیالیشدا

نا هێڵێت چاوی جوانت

بە گەشی ئاسمانی دڵم کەوێت!

زانا سەعیدزادە / سەقز نیوەشەوی 1396/06/17 کۆچی هەتاوی

برچسبها: شێعری کوردی, شیعری کوردی, شعر کردی, شعر کوردی, زانا

+ نوشته شده توسط زانا سعیدزاده در جمعه هفدهم شهریور ۱۳۹۶ و ساعت 1:50 |